Ljótu hálfvitarnir spila fjöruga, þjóðlagaskotna tónlist með áherslu á skemmtanagildi texta og tónlistar. Áhrifin koma víða að, enda sveitin fjölmenn og flestir fást bæði við laga- og textasmíðar. Hana skipa níu menn sem eiga það helst sameiginlegt að eiga uppruna í Þingeyjarsýslum. Aldursbilið er breitt, meðalfallþunginn er skikkanlegur en segir hreint ekki neitt um öfgarnar í báðar áttir. Sama mætti segja um skeggvöxt og jafnvel hæð yfir sjávarmáli.

Eitt af aðalsmerkjum bandsins er hljóðfæraskipan hennar því þeir nota öll möguleg og ómöguleg hljóðfæri og sjaldgæft er að sami maður spili á sama hljóðfærið tvö lög í röð. Þannig gengur oft ýmislegt á á tónleikum þegar níu menn, sumir hverjir feitir, þurfa að skipta um hljóðfæri eftir hvert lag. Skemmtan sem engan svíkur.

Hljómsveitin varð til í núverandi mynd í árslok 2006, þegar tríóið Ljótu hálfvitarnir og septettinn Ripp, Rapp og Garfunkel ákváðu að rugla reitum undir nafni hinna fyrrnefndu. Sumarið eftir kom frumburður sveitarinnar út og hafa Hálfvitar verið sæmilega iðnir við spilamennsku síðan.