HÓTEL EDDA

Sjötta plata Ljótu hálfvitanna er komin á streymisveituna góðkunnu Spotify. Þangað eru allir velkomnir, eins og á hótelið sem kennt er við hótelstjórann geðþekka, og skyldi alls ekki ruglað saman við hótel sem eru kennd við eitthvað allt annað fólk.

Á Hóteli Edda eru tólf lög sem hálfvitarnir hafa verið að skrúfa saman í vinnubúðum undanfarin ár og tóku loks upp í endanlegri mynd í stífri vinnutörn á því forna höfuðbóli Möðruvöllum í Hörgárdal í janúar síðastliðin undir dyggri stjórn Einars Vilberg, sem kom upptökunum síðan í endanlega mynd.

Það er óþarfi að taka fram að Hálfvitarnir eru ákaflega ánægðir með Hótelið sitt. Góður staður til að bíða af sér óáran. Heitur pottur, nóg nautahakk og elskulegasti hótelstjóri síðan Basil Fawlty.

Fyrir safnara og fólk af gamla skólanum (og safnara af gamla skólanum) hefur verið sett í gang framleiðsla á svokölluðum geisladisk (CD). Þeir sem hafa hug á að eignast svoleiðis grip geta lagt inn pöntun hér á vefnum og fengið eintak sent heim að dyrum í fyllingu tímans, sem verður vonandi um miðjan apríl.